Meri AAnkh kese chalak Gai

mujhe apne zabt pe naz tha, sar-e-bazm rat ye kiya huwa
meri aankh kese chalak gai, mujhe ranj he ye bura howa

mujhe jo bhi dushman-e-jan mila wo pukhta kar-e-jafa mila
na kisi ki zarb ghalat pari, na kisi ka teer khata huwa

mujhe ap kiyoon na samajh sake, ye khud apne dil hi se poochiye
meri dastan-e-hayat ka, to warq warq he khula huwa

mujhe aik gali main para huwa, kisi bad naseeb ka khat mila
kahin khoon-e-dil se likha huwa kahin aansoon se mita huwa

mujhe hamsafar bhi mila koi to shakista hal meri tarah
kai manzilon ka thaka huwa kahin raste main lota huwa

humain apne ghar se chale hoe sar-e-rah umar guzar gai
na kisi justujoo ka sila mila na safar ka haq hi ada huwa

mujhe apne zabt pe naz tha, sar-e-bazm rat ye kiya huwa
meri aankh kese chalak gai, mujhe ranj he ye bura huwa